Тропари и Богородичны воскресны

ТРОПАРИ И БОГОРОДИЧНЫ ВОСКРЕСНЫ

Тропарь, глас 1. Ка́мени зна́менану от июде́й, и во́ином стрегу́щим пречи́стое те́ло Твое́, воскре́се в тре́тии день Спа́се, да́руя ми́рови жи́знь. Сего́ ра́ди си́лы небе́сныя вопия́ху Ти, Жизнода́вче: сла́ва воскресе́нию Ти Христе́, сла́ва ца́рствию Ти, сла́ва смотре́нию Твоему́, еди́не Человеколю́бче.
Богородичен. Гаврии́лу провеща́вшу Ти Де́во, е́же радуйся! И со́ гласом воплоща́шеся всех Влады́ка, в Тебе́ святе́м киво́те, я́коже рече́ пра́ведный Давы́д. Я ви́ся простра́ннейши небе́с, поноси́вши Зижди́теля Своего́. Сла́ва все́льшемуся в Тя, сла́ва проше́дшему из Тебе́, сла́ва свободи́вшему нас рожество́м Твои́м.
Ипакой. Разбо́йничо покая́ние рай отве́рзе, плач же мироно́сиц ра́дость возвести́, я́ко воскре́се Госпо́дь, подая́ ми́рови ве́лию ми́лость.
Тропарь, глас 2. Егда́ сни́де к сме́рти, Животе́ безсме́ртныи, тогда́ а́да умертви́л еси́ блиста́нием Боже­ства́. Егда́ же уме́ршия от преиспо́дних воскреси́, вся си́лы небе́сныя взыва́ху Ти: Жизнода́вче Христе́ Бо́же, сла́ва Тебе́.
Богородичен. Вся па́че смы́сла, вся пресла́вная Твоя́, Богородице та́иньства; чистото́ю запечатле́нна, и де́вьством храни́ма; Ма́ти разуме́ся нело́жна, Бо́га ро́ждьши и́стиннаго; Того́ моли́ спасти́ся душа́м на­́шим.
Ипакой. По́ страсти ше́дше на́ гроб жены́ пома́зати те́ло Твое́, Христе́ Бо́же, ви́деша а́нгелы во́ гробе и ужасо́шася. Глас бо слы́шаху от них, я́ко воскре́се Госпо́дь, подая́ ми́рови ве́лию ми́лость.
Тропарь, глас 3. Да веселя́тся небе́сная, и ра́дуются земна́я, я́ко сотвори́ держа́ву мы́шцею Свое́ю Госпо́дь, попра́в сме́ртию сме́рть; Пе́рвенец из ме́ртвых бысть, и́з чрева а́дова изба́вил есть нас; и пода́ст ми́рови ве́лию ми́лость.
Богородичен. Тебе́ Хода́таицу спасе́ния ро́да на́шего, воспева́ем Богоро́дице Де́во. Пло́тию бо, ею́же из Тебе́ проше́д Сын Твой и Бог наш, кре́стную прие́м стра́сть, изба́вил есть нас из истле́ния, я́ко Человеколю́бец.
Ипакой. Удивля́я внде́нием, ороша́я глаго́ланием, блиста́яися А́нгел мироно́сицам веща́ше: что Жива́го и́щете во́ гробе; воста́ Испраздни́выи гро́бы. Тли премени́теля разуме́йте Непреме́ннаго. Рцы́те Бо́гови: коль стра́шна де́ла Твоя́, я́ко род спасл еси́ челове́ческии.
Тропарь, глас 4. Све́тлую воскресе́ния про́поведь, от А́нгела уве́девше Госпо́дни учени́цы, и пра́деднее осужде́ние отве́ргше, апо́столом хва́лящеся глаго́лаху: испрове́ржеся смерть, воскре́се Христо́с Бог, да́руя ми́­рови ве́лию ми́лость.
Богородичен. И́же о́т века утае́нное, и а́нгелом несве́домое та́инство, Тобо́ю Богоро́дице земны́м яви́ся Бог в неразме́сне сня́тии воплоща́ем. И Крест во́лею нас ра́ди восприе́м, им же воскреси́ пер возда́н наго, и спасе́ от сме́рти душа́ на́ша.
Ипакой. И́же Твоего́ пресла́внаго воста́ния, предте́кше мироно́сицы, апо́столом благовествова́ху, я́ко воскре́се Христо́с, я́ко Бог, подая́ ми́рови ве́лию ми­́лость.
Тропарь, глас 5. Собезнача́льное Сло́во Отцу́ и Ду́хови, Е́же от Де́вы ро́ждьшееся на спасе́ние на́ше, воспое́м ве́рнии и поклони́мся (поклон). Я́ко благоизво́ли пло́тию взы́ти на́ Крест, и смерть претерпе́ти, и воскреси́ти уме́ршия в сла́вное воскресе́ние Свое́.
Богородичен. Ра́дуйся две́ри Госпо́дня непроходи́мая. Ра́дуйся стено́ и покро́ве, прибега́ющим к Тебе́. Ра́дуйся заве́треннее приста́нище неискусобра́чная, ро́ждьшая пло́тию Творца́ Своего́ и Бо́га, моля́щи не пре́зри о воспева́ющих, и кла́няющихся рожеству́ Твоему́ (поклон).
Ипакой. А́нгельским зра́ком ум смуща́юще, и боже́ственым воста́нием душа́ просвеща́юще, мироно́сицы апо́столом благовествова́ху: возвести́те во язы́цех воскресе́ние, Го́споду поспешеству́ющу чудесы́, подаю́щему нам ве́лию ми́лость.
Тропарь, глас 6. А́нгельския си́лы на́ гробе Твое́м стрегу́щая омертви́ша, и стоя́ше Ма́рия при́ гробе, и́щущи пречи́стаго те́ла Твоего́. Исирове́рже а́да, не иску́шься от него́. Сре́те деву́, да́руяи живо́т. Воскре́с из ме́ртвых, Го́споди сла́ва Тебе́.
Богородичен. И́же благослове́ную нареки́и Ма́терь Себе́, прии́де на́ страсть во́лею Свое́ю, восия́в на Крес­те́. Взыска́ти хотя́ Ада́ма. Глаго́ля а́нгелом: сра́дуйтемися, я́ко обре́теся изги́бшая дра́хма. И́же вся му́дре устро́ивыи, Го́споди, сла́ва Тебе́.
Ипакой. Во́льною и животво́рною Ти сме́ртию, Христе́ Бо́же, врата́ а́дова сокруши́в, я́ко Бог. Отве́рзл еси́ нам дре́внии рай. Воскре́с из ме́ртвых, изба́ви из истле́ния живо́т наш.
Тропарь, глас 7. Разруши́ Кресто́м Свои́м смерть, и отве́рзл еси́ разбо́йнику рай. Мироно́сицам плач преложи́, и апо́столом пропове́дати повеле́, я́ко воскре́се Христо́с, я́ко Бог, подая́ ми́рови ве́лию ми́лость.
Богородичен. Я́ко на́шему воскресе́нию сокро́вище, на Тя наде́ющихся, Препе́тая, о́т рова из глубины́ прегреше́нии возведи́. Ты бо пови́нныя греху́ спасла́ еси́, ро́ждьши Спасе́ние на́ше. Я́же пре́жде рожества́ Де́ва, и в рожестве́ Де́ва, и по рожестве́ па́ки Де́вая.
Ипакой. И́же наш зрак восприе́мыи, и претерпе́в распя́тие пло́тию, спаси́ мя воскресе́нием Си, Христе́ Бо́же, я́ко Человеколю́бец.
Тропарь, глас 8. С вы́шних сни́де Милосе́рде, и погребе́ние прия́т тридне́вно, да нас свободи́ши от стра­сте́й. Животе́ и воскресе́ние на́ше, сла́ва Тебе́.
Богородичен. И́же нас ра́ди рожде́ися от Де́вы, и распя́тие претерпе́в Благи́и, испрове́ргии сме́ртию смерть, и воскресе́ние явле́и, я́ко Бог, не пре́зри их же созда́ руко́ю Свое́ю, яви́ человеколю́бие Свое́ Ми́лостиве, приими́ ро́ждьшую Тя Богоро́дицу, моля́щуюся за ны, и спаси́, Спа́се наш, лю́ди согре́шшия.
Ипакой. Мироно́сицы живода́вному предстоя́ще гро́бу, Влады́ку иска́ху в ме́ртвых Безсме́ртнаго, и ра́дость благове́щения от А́нгела прие́мше, апо́столом возвеща́ху: воскре́се Христо́с Бог, пода́я ми́рови ве́­лию ми́лость.
Сия тропари воскресны, глаголем по Великом славословии и по Трисвятом, во вся недели. Егда иерей изглаголет возглас: Яко Твое есть царство. Псаломщик глаголет: Аминь.
Егда во октаи глас 1, 3, 5, 7, глаголем сей тро­парь: Днесь спасе́ние ми́ру, пое́м воскре́сшаго и́з гро­ба, Нача́льника животу́, Христа́ Бо́га на́шего; разру­ши́в бо смерть, побе́ду даде́ нам, и ве́лию ми́лость.
Егда же глас 2, 4, 6, 8, глаголем: Воскре́с и́з гроба, у́зы растерза́в, разруши́л еси́ Го́споди, сме́рти осужде́ние, и вся от се́ти неприя́зненыя изба́вль. Яви́ Себе́ апо́столом Свои́м, и посла́в их на́ проповедь, и те́ми мир Свой по́дал еси́ вселе́нней, еди́не Многоми́лостиве.