Канон Пасхе

По обычнем начале глаголем: За молитв святых отец наших, Господи Исусе Христе, Сыне Божии, помилуи нас. Аминь.
Головщик возглашает на 5-й глас: Христос воскресе из мертвых, смертию на смерть наступи и гробным живот дарова (трижды); мы же на последнем возгласе: и гробным живот дарова.
Таже: Христос воскресе (поем трижды, по крылосам).
Посем глаголет стихи:
Да воскреснет Бог и разыдутся врази Его.
Яко исчезает дым, да исчезнут.
Тако да погибнут грешницы от лица Божия, а праведницы возвеселятся.
Сеи день, иже сотвори Господь, возрадуемся и возвеселимся в онь.
Слава Отцу и Сыну и Святому Духу.
И ныне и присно и во веки веком, аминь.
Мы же ко всякому стиху поем: Христос воскресе из мертвых, смертию на смерть наступи и гробным живот дарова (единожды).
Вместо Аллилуия поет: Христос воскресе из мертвых, смертию на смерть наступи; а мы: и гробным живот дарова.
Таже: Слава, и ныне, седален, глас 4. Предвариша утро, яже с Мариею и обретоша камень отвален от гроба, слышаху от Ангела, Иже во свете присносущнем Сущаго с мертвыми не ищите, яко человека; видите гробныя пелены, тецыте и мiру проповедите: яко воста Господь, умертвивыи смерть; яко Той есть Сын Божии, спасаяи род человеческии.
Господи помилуй (12). Слава, и ныне.
Таже: канон Пасце со ирмосом на 6. А в среду и пяток Светлыя седмицы поем канон Пасце на 8, с богородичны того же канона.

Канон, глас 1.

Песнь 1, ирмос.
Воскресения день просветимся людие, Пасха Господня, Пасха; от смерти убо к жизни и от земли на небо, Христос Бог нас превел есть, победную поюща (дважды).
Запев: Христос воскресе из мертвых (поклон) .
Очистим чувствия и узрим, неприступным светом Воскресения Христова, блистающеся и радуитеся рекуще, ясно да услышим, победную поюще (дважды).
Слава. И ныне. Небеса убо достойно да веселятся, земля же да радуется, да празднует же мiр, видимыи же весь и невидимыи; Христос Бог востал есть, веселие вечное (дважды).
Катавасия. Сохрани от бед рабы Своя Милостиве, яко усердно к Тебе прибегаем, к Милостивому Избавителю и всех Владыце, Господу Исусу (поклон). Господи помилуй (трижды, с поклонами).
Песнь 3, ирмос.
Приидите, пиво пием ново, не от камене неплодна чудодеемо, но нетления источника, из гроба одождивша Христа; о Нем же утвержаемся (дважды).
Запев. Ныне вся исполнишася света, небо же и земля и преисподняя; да празднует убо вся тварь востание Христово, о Нем же утвержаемся (дважды).
Слава. И ныне. Вчера сраспинахтися Христе, вчера спогребохтися, и совостаю днесь совоскресшу Ти, Сам мя прослави Спасе, во царствии Своем (дважды).
Катавасия.

Слава, и ныне, седален, глас 4. Предвариша утро.

Песнь 4, ирмос. На Божии стражи, богоглаголивыи Аввакум да станет с нами, и явит светоносна Ангела, велегласно глаголюща: днесь спасение мiру, яко воскресе Христос, яко всесилен (дважды).
Запев. Мужескии убо пол, яко разверзе девственную утробу, бысть Христос, яко человек же; Агнец наречеся, непорочен же, яко не вкуси скверны; наша убо Пасха, яко Бог истинен и совершен явися (дважды).
Слава. Яко единолетен Агнец, благословеныи нам венец Христос, волею за всех заклан бысть, Пасха очистилище, и абие из гроба красно праведное нам возсия Солнце.
И ныне. Богоотец убо Давыд, пред сенным ковчегом скакаше играя; людие же Божии святии, образом сбытие зряще, веселимся Божественне: яко воскресе Христос, яко всесилен.
Катавасия.

Песнь 5, ирмос. Утренюем утренюю глубоку, и вместо мира, песнь принесем Владыце, и Христа узрим праведное Солнце, всем жизнь восияюща (дважды).
Запев. Безчисленое Твое милосердие, иже адовыми узами содержими зряще, к свету идяху Христе, веселыми ногами; Пасху хваляще вечную (дважды).
Слава. И ныне. Приступим светоноснии, исходящу Христу из гроба, яко Жениху; и спразднуем праздно любезными чинми, Пасху Божию спасительную (дважды).
Катавасия.

Песнь 6, ирмос. Сниде в преисподняя страны земли, и сокруши вереи вечныя преисподняя связанныя Христе, и тридневно, яко от кита Иона, воскресе от гроба (дважды)
Запев. Сохранив цела знамения Христе, воскрес от гроба, Иже ключа Девыя не вредивыи в рожестве Своем, и отверзл еси нам раиския двери (дважды).
Слава. И ныне. Спасе мой живо, а не мертвенное заколение, яко Бог, Сам Себе волею приведе ко Отцу, совоскреси же всеродна  Адама, воскресе от гроба (дважды).
Катавасия.
Господи помилуй (трижды). Слава, и ныне.

Кондак, глас 8. Аще и во гроб сниде Безсмертне, но адову разрушив силу и воскресе, яко победитель, Христе Боже, женам мироносицам радость провещав, и Своим апостолом мир дарова, Иже падшим подая воскресение.
Икос. Иже прежде солнца, Солнцу зашедшу иногда во гроб; предвариша ко утру взыскающе, яко во дни мироносицы девы, и други к друзей вопияху: 0! другиня, приидите вонями помажем Тело живоносное и погребеное, плоть воскресивша падшаго Адама, лежаща во гробе; идем и потщимся, яко же волсви, и поклонимся и принесем мvро, яко дары, не в пеленах, но в плащанице Обвитому, и с плачем возопием: 0! Владыко, востани, Иже падшим подая воскресение.

Песнь 7, ирмос. Отроки от пещи избавив, быв убо Человек, страждет яко смертен, и страстию мертвеною в нетление облачит благолепие; един благословен отцем Бог и препрославлен (дважды).
Запев. Жены с миром богомудрыя, во след Тебе течаху; Его же яко мертва со слезами искаху, поклонишася и радующеся живому Богу, и пасху тайную Твоим Христе, учеником благовестиша (дважды).
Слава. Яко воистину священная и всепраздньственная, сия спасительная нощь и светозарная, светоноснаго дне, востанию сущи провозвестница; в ней же безлетныи Свет, из гроба плотски всем восия.
И ныне. Смерти празднуем умерщвение, адово разрушение, иного живота вечнаго начало; и играюще поем Виновнаго, единаго благословена отцем Бога и препрославлена.
Катавасия.

Песнь 8, ирмос. Сей убо нареченныи святыи день, един суботам Царь и Господь, праздник праздником и торжество есть торжеством, вонь же благословим Христа во веки (дважды).
3апев. Приидите, новаго винограда чада, божественнаго веселия, в нарочитом дни воскресения, царствия Христова приобщимся, поюще Его, яко Бога во веки (дважды).
Слава. Возведи окрест очи твои Сионе, и виждь, се убо приидоша к тебе, яко богосветлая светила, от запада и севера и моря и востока чада твоя, в тебе благословяще Христа во веки.
(Троичен: Пресвятая Троице, Боже наш, слава Тебе.)
И ныне. Отче Вседержителю и Слове и Душе, треми соединяемое в составех естество, пресущественыи и пребожественыи, в Тя крестихомся и Тя благословим во вся веки.
Катавасия.

Песнь 9, ирмос. Светися, светися, новыи Иеросалиме, слава бо Господня на Тебе восия; ликуй ныне и веселися, Сионе; Ты же Чистая красуися Богородице, о востании Рожества Твоего (дважды).
Запев (поклон). 0! божественаго, 0! любезнаго, 0! сладкаго Ти гласа, с нами бо неложно обещался еси быти, до скончания века, Христе; Его же вернии державу и надежду имуще радуемся (дважды).
Слава. И ныне. 0! Пасха велика и священная, Христе; 0! Мудросте, Слове Божии и сило, подавай нам истее Тебе причащатися, в невечернем дни царствия Твоего (дважды).
Катавасия.
Задостойник: Светися, светися (поклон земной).
Христос воскресе (полностью, трижды); седален: Предвариша утро. Слава, и ныне, кондак: Аще и во гроб.
Господи помилуй (40). Слава, и ныне. Христос воскресе (полностью, трижды).
Головщик: Христос воскресе из мертвых, смертию на смерть наступи; а мы: и гробным живот дарова.
Отпуст: Воскресыи из мертвых, Господи Исусе Христе, Сыне Божии, молитв ради Пречистыя Ти Матере, силою честнаго и животворящаго Креста, и святых славных и всехвальных апостол, и всех ради святых, помилуй и спаси нас, яко Благ и Человеколюбец. Аминь.
Настоятельствуяи возглашает: Христос воскресе! (трижды), молящиеся отвечают: Воистину воскресе! (трижды), осеняя себя крестным знамением, без поклонов.

СТИХЕРЫ ПАСЦЕ

Три поклона с молитвою мытаря Боже, милостив...
За молитв святых отец наших, Господи Исусе Христе, Сыне Божии, помилуй нас. Аминь.
Христос воскресе... (полностью, трижды).
Стих: Да воскреснет Бог, и разыдутся врази Его (на глас 5).
Пасха священная нам днесь показася, Пасха ново святая, Пасха таинственная, Пасха всечестная, Пасха Христа Избавителя, Пасха непорочная, Пасха великая, Пасха верным, Пасха двери раиския нам отверзающи, Пасха всех освящающая верных.
Стих: Яко исчезает дым, да исчезнут.
Приидите от видения жены благовестницы, и Сиону рцыте: приими от нас радость благовещения, воскресения Христова, красуися и ликуй и радуися Иеросалиме, Царя Христа узрев из гроба, яко Жениха исходяща.
Стих: Тако да погибнут грешницы от лица Божия, а праведницы возвеселятся.
Мироносицы жены, зело рано предсташа гробу Живодавца, и обретоша Ангела на камени седяща, и тои провещав им, сице глаголаше: что ищете Живаго с мертвыми? что плачите Нетленнаго во тли? шедше проповедите учеником Его.
Стих: Сей день иже сотвори Господь, возрадуемся и возвеселимся вонь.
Пасха красна. Пасха Господня, Пасха. Пасха всечестная нам восия. Пасха, радостию друг друга приимем. 0! Пасха, избавление скорби, ибо из гроба днесь, яко от чертога, восия Христос; жены радости исполни, глаголя: проповедите апостолом.
Слава Отцу и Сыну и Святому Духу, и ныне и присно и во веки веком, аминь.
Воскресения день, просветимся торжеством, и друг друга приимем, и рцем братие, и ненавидящим нас простим вся Воскресением, и тако возопием: Христос воскресе из мертвых, смертию смерть поправ, и сущим во гробех живот дарова.
Христос воскресе... (полностью, трижды, пением). Посем отпуст, как молебну.
И три поклона с молитвою мытаря Боже, милостив...