Кано́н Свято́му и Вели́кому чудотво́рцу Нико́ле, пева́емыи в напа́стех и зело́ ско́рбных обстоя́нии

Тропарь, глас 4-и.

Пра́вило ве́ре, и о́браз кро́тости, воздержа́нию учи́теля, яви́ тя Госпо́дь ста́ду Своему́, я́же веще́м и́стина; сего́ ра́ди стяжа́в смире́нием высо́кая, нището́ю бога́тая. О́тче наш святи́телю Ни­ко́лае, моли́ Христа́ Бо́га, спасти́ся душа́м на́шим (дважды).

Слава, и ныне, богородичен. И́же о́т века утае́нное, и а́нгелом несве́домое та́иньство, Тобо́ю Богоро́дице земны́м яви́ся Бог, в неразме́сне сня́тии воплоща́ем, и Крест во́лею нас ра́ди восприи́м, им же воскре­си́в первозда́ннаго, и спасе́ от сме́рти ду­ша́ на́ша.

Канон, глас 5-и. Песнь 1, ирмос.

Велича́ваго Фарао́на в мо́ри потопи́вша со ору́жием и вса́дники, Изра́иля же пресла́вно спа́сша, и по́ суху прове́дша, пое́м Христа́, я́ко просла́вися.

Запев: Святи́телю Христо́в Нико́лае, моли́ Бо́га о нас (поклон).

Иму́ще тя предста́теля к Ще́дрому, и́же напа́стьми и печа́льми одержи́мии, к те­бе́ прибега́ем. Да́руй ру́ку, спаса́ющую нас от вся́кия тесноты́, ты бо стре́лы лука́ваго притупи́л еси́ преподо́бие, противле́нием боже́ственных ти трудо́в; но твои́ми моли́твами му́дре, от того́ злоде́йствия соблюди́ неврежде́ны, тебе́ воспева́ющия, вели́кии Нико́лае.

Запев. Сокруши́ вра́жия ко́зни, ви́димыя и неви́димым Нико́лае, всегда́ борю́щия мя враги́ в безконе́чную па́губу посли́, и мене́ от неду́г и собла́зн жите́иских, напа́стей же и скорбе́й изба́ви, и́же моли́твеника тя стяжа́вших ко́ Господу. Отверза́ющияся на мя уста́ лука́вая за­гради́, ви́димых враг и неви́димых, да изба́влюся твои́ми свя́те моли́твами.

Слава. Изба́ви мя мирски́х собла́зн, и от бесо́вскаго озлобле́ния, язы́ческаго плене́ния, и всех челове́к лука́вых врежде́ния. Успи́ зло́бу вражду́ющих на мя, да тя я́ко изба́вителя на́шего восхваля́ем.

И ныне, богородичен. Де́во еди́на Чи́стая, Обра́дованная, помози́ ми, при́сно обурева́емому жите́йскими напа́стьми, и отча́емаго от мно́жества беззако́нии, спасе́нию мя сподо́би, Я́же паде́ния Ада́мова испра́ви, та́ко же воздви́гни и мене́, па́дшаго в зло́бный ров, моли́твами Твои́ми Де́во, и боже́ственнаго Нико́лы.

Катавасия. Изба́ви от бед рабы́ своя́, свя­ти́телю Христо́в Нико́лае, я́ко вси́ по́ Бозе к тебе́ прибега́ем, ско́рому помо́щнику и те́плому засту́пнику, и моле́бнику ко Спа́су о душа́х на́ших (поклон).

Го́споди, поми́луй (трижды, с поклонами).

Песнь 3, ирмос.

Коле́блемое се́рдце мое́ Го́споди, волна́ми жите́йскими, утверди́; во приста́нище ти́хое наставля́я, я́ко Бог.

Запев. Я́коже дре́вле ю́зники изба́вил еси́ от сме́рти, та́ко и мене́ изба́ви искуше́нии жите́йских. И́бо в пучи́не лю́тых пла́вающе, волна́ми всеблаже́нне, обно­си́м есмь. Ру́ку ми ны́не пода́тельную по­́мощи пода́ждь, о́тче Нико́лае: от враг ви­́димых же и неви́димых изба́ви мя.

Запев. О вселе́нней принося́ моле́ния: от вся́кия ну́жды и скорбе́й безчи́сленых, спаси́ мя. Ты бо свя́занных неизбе́жно из темни́цы изба́вил еси́, и у́зы растерза́в зол мои́х, моли́твами си, при́мири Бо́гови, свя́те Нико́лае.

Слава. Сове́ты о́тче, подвиза́емыя при­́сно на мя ненака́занных челове́к, твои́ми моли́твами, безде́льны сотвори́, и неду́ги души́ моея́ ути́ши; уста́ отверза́ющияся всу́е на лю́бящих тя, па́стырю, загради́. Вем бо, и́же призыва́выи тя в ско́рбех, и ско́ро обря́щет утеше́ние. Тем же ти ся молю́: вся боле́зни моя́, Нико́ло, облегчи́.

И ныне, богородичен. Уврачу́й Всенепоро́чная, неисце́льно боля́щую окая́нную ду́шу мою́ жите́йскими лестьми́, и мно­́гим грехо́м приве́ржену. Я́ко Свет ро́ждьшая, просвети́ ду́шу мою́, омраче́нную страстьми́, и моли́ся с Нико́лою му́дрым: от вся́каго греха́, вся́каго вре́да, и вся́кия зло́бы вра́жия, и злых челове́к, изба́вити мя. Катавасия.

Седален, глас 8-и.

Я́ко ревни́теля тя боже́ственаго, и помо́щника по всему́ тебе́ призыва́ющим те́пле, во всем ми́ре блаже́нне, Творе́ц вели́ка показа́; аз же́ сокруше́ным се́рдцем вопию́ ти, о́тче: уте­ше́ние ми бу́ди в ско́рбех, печа́ль разго­ня́я всегда́ от души́ моея́, внеза́пу находя́щия на мя искуше́нии многообра́зных, за мно́жество мои́х согреше́нии. Не оста́ви мене́ блаже́нне, без заступле́ния, но прост­ри́ ми, я́ко ми́лостив, по́мощи ру́ку и спа­си́ мя вельми́ бе́дствующаго, бесо́вскими лука́выми наве́ты, и тлетво́рных челове́к. Я́ко да тишину́ получи́вше, восхваля́ю тя, священнотаи́нниче Нико́лае.

Слава. Коле́блющееся бесо́вскими ис­куше́нии, и от оби́дящих челове́к, се́рдце мое́ ути́ши; и успи́ твои́ми неусыпа́ющими моли́твами, я́же на мя воста́ющия на­па́сти: тя бо в нощи́ и во́ дни засту́пника нарица́ю; молю́ тя: моли́твы моя́ принеси́ Го́сподеви, и сохраня́я мя при́сно, свя́­те Нико́лае.

И ныне, богородичен. Во искуше́ния многоплете́нная впад, от враг ви́димых и неви́димых, и бу́рею безчи́сленных ми грехо́в одержи́м есмь, Пречи́стая. На­па́стьми жития́ сокруши́ся кре́пость моя́, да я́ко к те́плому заступле́нию и покро́­ву, ко приста́нищу моему́, притека́ю Твоея́ бла́гости. Те́м же Пречи́стая, из Тебе́ Воплоти́вшагося без се́мени, моли́ о всех рабе́х Твои́х, непреста́нно пою́щих Тя, Богоро́дице Пречи́стая, моля́щи Того приле́жно: согреше́нии оставле́ние дарова́ти, поклоня́ющимся ве́рою Рожеству́ Твоему́ (поклон).

Песнь 4, ирмос.

Боже́ственое Твое́ разуме́в смотре́ние, дивя́ся Авва́кум, Христе́, тре́петно вопия́ше: на спасе́ние лю́дем Си, спасти́ благи́я Своя́ прише́л еси́.

Запев. Я́коже благода́ть прие́м исцеле́нием, всеблаже́иие Нико́лае. Души́ моея́ я́звы моли́твами си исцели́, и находя́щих искуше́нии изба́ви мя, кре́пкою твое́ю моли́твою, всеразсла́бленую ду́шу мою́ прегреше́нии и жития́ злолю́тых. Спаси́ мя твои́ми мольба́ми, преди́вне святи́телю.

Запев. Преиспещре́н Боже́ственою благода́тию, святи́телю о́тче, от разли́чных искуше́нии и бед, спаси́ прибега́ющия в кров твой при́сно, ты бо первосвяще́нником удобре́ние, благоуха́ние Боже́ственаго Ду́ха, Нико́лае му́дре. Мирово́нными ти моли́твами, злосмра́дныя стра́сти отжени́ от се́рдца моего́, молю́ся.

Слава. Я́ко всех повеле́нии Бо́жиих ис­по́лнитель, тече́ние свое́ сконча́в преподо́бно, о Христе́ пути́ моя́ испра́ви, я́же к Нему́, о́тче богоно́се Нико́лае, и соблюда́ти поспеши́ нам, и́же на земли́ за­коноположе́ния ко спасе́нию веду́щия. И изба́ви мя от напа́стей находя́щих, я́ко да убежа́в безпу́тнаго блуже́ния, и ко спасе́нному дости́гну соверше́нию.

И ныне, богородичен. Изба́ви мя от всех напа́стей и от мно́гих собла́зн зми́евых, и от ве́чнаго огня́ и тмы, Всенепоро́чная. Разуме́в бо проро́к Ду́хом Бо́жиим, го́ру Тя приосе́нную преднаписа́в Чи́стая. Иста́явшия зно́ем мно́гих прегреше́нии, про­хлади́ хода́тайством Си, Де́во. Еди́на челове́ком исправле́ние. Катавасия.

Песнь 5, ирмос.

Окая́нную ду́шу мою́, в нощи́ борю́щуюся со тмо́ю страсте́й, предвари́в Христе́, уще́дри, и возсия́й во мне. Со́лнце мы́сленое, дне све́тлыя лучи́, да озари́т мя по́ нощи свет.

Запев. Мольбу́ ны́не сотвори́ о́тче, о рабе́ твое́м, я́ко да оставле́ние согреше́нием прииму́, и от одержа́щия ско́рби да изба́влюся, и вся́кия тесноты́ свобожду́ся. Тебе́ бо молю́ Нико́лае, блага́го хода́тая ко́ Господу: не оста́ви мя без заступле́ния, но обы́чною си моли́твою спаси́ мя.

Запев. Рачи́тельною моли́твою си му́д­ре, се́рдца моего́ напра́ви стези́ храни́­тельно, на ка́меии Бо́жиих за́поведей пресве́тлых. Спаси́ от кова́рств па́костных, и разреше́ние мно́гих грехо́в мои́х испро­си́, се́тей жите́йских и ну́жных, и искуше́­нии вся́ческих находя́щих. Свяще́нне Ни­ко́лае, всем ве́рным засту́пниче, и святи́­телем основа́ние.

Слава. Вкуси́в преподо́бие боже́ственныя сла́дости, го́ресть возненави́дел еси́ страсте́й и сласте́й, от них же мя изба́ви, моля́ Христа́, и вост́ающия беды́ утоли́. Ты бо столп непоколеби́м, и утверже́ние ве́рным: при́сно мя коле́блема жите́й­скими зло́бами, и бесо́вскими духнове́нии, укрепи́, всеблаже́нне Нико́лае, мо­ли́твами си.

И ныне, богородичен. Уврачу́й Пречи́стая стра́сти се́рдца моего́, ро́ждьшая всех Врача́, и пра́ведных ча́сти яви́ мя при­ча́стника; омраче́наго мя все́ми прило́ги лука́ваго, и во уны́нии живу́ща и прогне́вающа Бо́га, просвети́ Всенепоро́ч­ная, и наста́ви к до́брым де́ланием, я́ко Вина́ су́щи всем до́брым. Катавасия.

Песнь 6, ирмос.

Я́коже проро́ка от зве́ря изба́вил еси́ Го́споди, и мене́ из глуби­ны́ беззако́нных страсте́й возведи́, мо­лю́ся, да приложу́ призре́ти ми к Це́ркви святе́й Твое́й.

Запев. Я́ко Христо́ва святи́теля, я́ко светоза́рную звезду́, я́ко чудесе́м самотво́рца, я́ко исто́чника исцеле́нием, я́ко су́щим в скорбе́х помо́щника, и я́ко изба́­вителя тепле́йша в беда́х о́тче, восхваля­́ем тя, па́стыря вели́каго, и подо́бника о всем, нача́льному Па́стырю Христу́, приле́жно мо́лим тя, Нико́лае: от вся́ких ис­куше́нии упаси́ рабы́ своя́, и избавля́й от всех жите́йских напа́стей всегда́.

Запев. Стезю́ я́же та́мо веду́щую, угла́ди ми, преблаже́нне, жите́йских волн об­легчи́ мя, и ко приста́нищу жи́зни возве­ди́. Глаго́л Боже́ственных послу́шателю, услы́ши моя́ глаго́лы: изба́ви мя от бе­со́вских собла́зн, и беззако́нных муже́й, и вся́ких обстоя́нии находя́щих, вели́кии Нико́лае.

Слава. Огня́ искуше́нии на всяк день примеша́юся, посреди́ се́тей мно́гих хо­жу́, я́ко же пти́ца; под твой ще́дрыи по­кро́в притека́ю, невре́дна мя сохрани́, моли́тву мою́ услы́ши спе́шно, о́тче Ни­ко́лае, потщи́ся приити́ ми на́ помощь обурева́емому скорбьми́, и ну́ждами жи­те́йскими и бесо́вскими озлобле́нии, я́ко да спаса́емь, пою́ предста́тельство твое́.

И ныне, богородичен. Господороди́тельнице Чи́стая, облада́ема мя мно́гими страстьми́, я́ко Блага́, предста́в изба́ви от сих, я́ко да Тя воспева́ю душе́ю и се́рд­цем и язы́ком, спаса́емь. Катавасия.

Слава, и ныне. Кондак, глас 3-й, подо­бен:

Де́вая днесь. В Ми́рех свя́те Нико́лае, освя́щь себе́ житие́м соверше́нным, и яви́ся святи́тель Бо́га вы́шняго, от Него́ же укрепля́ем, ерети́чествующих уста́ загради́л еси́, и от бед лю́ди изба́вив; тем же и мене́, обурева́емаго печа́льми жите́й­скими, изба́ви, нас бо ра́ди показа́ся чудо­тво́рец изя́щен, преди́вен и ми́лостив.

Икос.

Воспое́м ны́не святи́теля пе́сньми, ми́рским лю́дем па́стыря и учи́теля, да моли́твами его́ просвети́мся. Сей бо яви́ся чист весь, нетле́нен ду́хом, Христо́ви принося́ же́ртву непоро́чну, чи́сту и благоприя́тну, я́ко святи́тель очище́н душе́ю и те́лом. И и́стинен Це́ркви пред­ста́тель и побо́рник, и чудотво́рец изя­́щен, преди́вен и ми́лостив.

Прокимен, глас 4-и:

Свяще́нницы Твои́ облеку́тся в пра́вду, и преподо́бнии Твои́ возра́дуются.

Стих: В це́рквах благослови́те Бо́га, Го́спода от исто́чник изра́илев.

Евангелие от Иоанна, зачало 36.

Рече́ Госпо́дь ко прише́дшим к Нему́ июде́ом: Аз есмь дверь, Мно́ю а́ще кто вни́дет, спасе́тся; и вни́дет и изы́дет, и па́жить обря́щет. Тать не прихо́дит, ра́зве да укра́дет и убие́т и погуби́т. Аз приидо́х, да живо́т и́мут и ли́шше и́мут. Аз есмь Па́стырь до́брый; па́стырь до́брый ду́шу свою́ полага́ет за овца́, а нае́мник, и́же несть па́стырь, ему́ же не́ суть овца́ своя́, ви́дит во́лка гряду́ща, и оставля́ет овца́ и бе́гает. И волк расхи́тит их, и распу́дит овца́. А нае́мник бежи́т, я́ко нае́мник есть, и не ради́т о овца́х. Аз есмь Па́стырь до́брый, и зна́ю Моя́, и зна́ют Мя Моя́; я́ко же зна́ет Мя Оте́ц, и Аз зна́ю Отца́, и ду́шу мою́ полага́ю за овца́. И и́ны овца́ и́мам, я́же не́ суть от двора́ сего́, и ты́я Ми подоба́ет привести́, и глас Мой услы́шат; и бу́дет еди́но ста́до и Еди́н Па́стырь.

Стихера, глас 6-и.

Насле́дниче Бо́жии, соприча́стниче Христо́в, слуго́ Госпо́день свя́те Нико́лае, по и́мени твоему́ та́ко и житие́ твое́: просия́ бо с седи́нами ра́зум, свиде́тельствоваше све́тлость лица́ твое­го́, душе́вное незло́бие; изве́ствоваше кро́тость, сло́во молчали́вое; жизнь твоя́ сла́в­на, и успе́ние со святы́ми; моли́ о душа́х на́ших.

Песнь 7, ирмос.

Пла́мень пе́щныи порабо́тиша благочести́вии о́троцы, тем свы́­ше оброси́ я́, гото́вы пали́мы по естеству́; но па́че естества́ му́жески поя́ху: благослове́н еси́ Го́споди, на престо́ле сла́вы ца́рствия Твоего́.

Запев. Свяще́ньству пра́вило, и кро́тос­ти о́браз, вем тя му́дре, на мя воста́ющую бу́рю, страсте́й и бед, укроти́ моли́твами си. И соблюди́ мя невреже́на; ты мою́ уте́ши, о́тче, ду́шу неви́димо, мно́жеством озло́бленую лю́те. Ты безме́рная ми укро­ти́ искуше́ния, я́же льсти́выи подви́жет ми во́ дни и в нощи́, благ мне предста́тель явля́яся, свяще́ннейшии о́тче Нико́лае.

Запев. И́же дре́вле я́влься во сне царю́, непови́нныя иму́щия у́мрети избавля́я, напа́стей мя изба́ви находя́щих всегда́, и от неду́г теле́сных и душе́вных боле́зней; ру́ку ми пода́ждь, к Бо́жией по́мощи Ни­ко́лае. И сохрани́ от лю́таго вра́жия ча́я­ния, я́коже и ю́ноши иногда́ сме́рти го́рькия изба́вль, да почита́ю тя, я́ко блага́го предста́теля.

Слава. Пресве́тлаго свети́льника неугаси́маго, на земли́ су́щаго столпа́, и ко приста́нищу Боже́ственому призыва́юща, и́же волна́ми жите́йскими при́сно потопля́емии, Нико́лу вси почте́м, и любо́вию ублажи́м.

И ныне, богородичен. Вопло́щшееся Сло́­во, премно́жеством благоутро́бия, неизрече́нно родила́ еси́, Того́ моли́ Пречи́стая: плотьски́я стра́сти и скве́рны всех изба́вити, и всех ну́жных жития́. Катавасия.

Песнь 8, ирмос.

Кре́пцыи о́троцы трие́ су́ще, си́лою обо́лкшеся, тричи́сленныя, улови́ша и победи́ша халде́и, и ди́вно измени́ся естество́: ка́ко огнь росо́ю прелага́шеся. Без туги́ я́ сохрани́, я́ко пелена­́ми, опролия́выи му́дрость на всех де́лех Твои́х, Бо́же; Тя превозно́сим во́ веки.

Запев. Во́ду жи́ву в се́рдцы имы́и бла­года́ть Госпо́дню, ороша́еши при́сно му́дре, и́же зно́ем скорбе́й и сухото́ю грехо́в бе́дствующих, окая́нне поги́бнути иму­́щих, всеблаже́нне. Иже избавле́и ведо­́мый на́ смерть непра́ведно, та́ко же и мене́ ны́не спаси́ от челове́к тлетво́рных стуже́ния, и от вся́кия бесо́вския ле́сти.

Запев. Зе́млю кро́тких насле́довал еси́, кро́ток преподо́бие быв, те́мже ти ся мо­лю́ ве́рно: укроти́ моли́твами си подвиза́ющияся на мя при́сно лука́ваго тре­волне́ния. Ты изба́вил еси́ и воево́ды, и́же непра́ведно у́мрети хотя́щия, та́ко от челове́к лука́вых озлобле́ния мя изба́ви, и от вся́каго бесо́вскаго наве́та, Нико́лае, свободи́, моля́ Спа́са.

Слава. Си́лою Бо́жиею всеблаже́нне укрепля́емь, ре́вность благоче́стия по ра́зу­му стяжа́л еси́. Те́мже хотя́щия непра́вед­но у́мрети изба́вил еси́, сего́ ра́ди тя мо­лю́: моле́ние Го́сподеви о́тче, неоску́дно приноси́ ты, я́ко да грехо́в и пла́мене му­че́ния ве́чнующаго, и напа́стей и скор­бе́й изба́вит мя, я́ко еди́н Преблаги́и.

И ныне, богородичен. Неусыпа́ющую Чи́стая, иму́щи моли́тву, успи́ моя́ стра́­сти, теле́сныя и душе́вныя, свяще́нны­ми хода́тайствы Твои́ми. Боже́ственную и спасе́ную даю́щи бо́дрость, И́же всели́выися во утро́бу Твою́ Сло́во, Ма́ти Чи́с­тая, и и́же дре́вле в челове́цех все́льшуюся от преступле́ния тлю, я́ко Бог, Еди́н вне изгна́л есть, за милосе́рдие ми́лости. Катавасия.

Песнь 9, ирмос.

Велича́ем, Христе́, Твою́ всенепоро́чную Ма́терь Чи́стую, я́ко роди́ Тя, па́че естества́, пло́тию всех Зижди́теля, вся́каго вре́да и тли нас избавля́юща.

Запев (поклон). Безпеча́льную жизнь насле́довав о́тче, и ра́дости духо́вный исполня́ем при́сно, вся́ку печа́ль отжени́, молю́ся, от души́ моея́; в житии́ тле́ннем ны́не, напа́стей вся́ких наполня́емь, пу­чи́ну при́сно препла́вая, да обря́щу тя преподо́бие окорми́теля, в тишину́ прелага́юща бу́рю, свяще́ннейшии о́тче Нико́лае.

Непра́ведно ведо́мыя на́ смерть изба­́вил еси́, ре́вностию Боже́ственною о́т­че, священноле́пно ра́згараяся, те́мже во­пию́ ти: та́ко же изми́ и мене́ от напа́стей, умерщвля́ющих лю́те; ты бо посреде́ ко всем призыва́ющим тя прихо́диши, облегчева́я боле́зни душ на́ших, и утеше́ние боголе́пно подава́я.

Запев. Свяще́нне о́тче, услы́ши мя в день наведе́ния бед и скорбе́й, и вся́кую тесноту́ отгоня́, благода́тию и́же в тебе́ живу́щаго Ду́ха. Аз, сокрове́ную страстьми́ жите́йскими, ду́шу мою́ имы́и, на́ по­мощь тя призыва́ю, свяще́нне Нико́лае: потщи́ся и даждь ми соверше́ное исцеле́­ние, победи́теля мя покажи́ моли́твами си, страсте́м ражда́ющим смерть, и без­зако́нных челове́к язы́ка льсти́ва; и́же ве́рою тя при́сно блажа́щих.

Слава. Муче́ния и́же в гее́не, и от лу­ка́вых челове́к стуже́ния вре́днейшаго изба́ви мя, свяще́нными моли́твами си пресла́вне. И́же дре́вле у́мрети непра́­ведно иму́щия воево́ды, изба́вишася твои́ми моли́твами; я́ко же тем по́мощь твою́ спаси́тельную низпосла́в, та́ко же низпосли́ и мне, чудотво́рче Нико́лае, в день беды́; от жите́йских напа́стей и лука́вых челове́к искуше́нии, лю́те обурева́емаго всегда́, исхи́ти вся́каго вре́да, достоблаже́нне.

И ныне, богородичен. Лю́дие твои́ и град мо́лят Тя, Ма́терь Бо́жию: изми́ нас от вся́кия беды́, Всечи́стая Влады́чице; и ме­не́ и́же небреже́нием ду́шу омрачи́вшаго, и в клеветы́ злых челове́к па́дшаго, просвети́ и изба́ви Чи́стая, я́же Свет ро́ждьшая, и се́рдца моего́ возжиза́ющи све́щник, я́ко да усе́рдием благи́м сла́влю Тя. Катавасия.

Задостойник: Влады́чице, приими́ мо­ли́тву раб Свои́х (поклон земной).

Трисвято́е, и по О́тче наш. Молитва Исусова. Тропарь: Пра́вило ве́ре. Слава, кондак: В Ми́рех свя́те Нико́лае. И ныне, богородичен: И́же о́т века утае́нное. Го́с­поди поми́луй (40, с поклонами). Слава, и ныне. Таже, молитва.

Запев: Святи́телю Христо́в Нико́лае, моли́ Бо́га о нас (поклон).

О! Освяще́нная главо Нико́лае, и́же имы́и апо́стольская дарова́ния, покажи́ ны́не и на нас, ни́щих и смире́нных рабе́х твои́х, свое́ оте́ческое благоутро́бие. Отжени́ от нас вся ве́щи неприя́знены, и вся́кия прило́ги страсте́й, и соблюди́ своея́ па́ст­вы, е́же есть ве́рных сочета́ние: вся, и́же во власти су́щия и все Христолюби́вое во́инство, освяще́нный чин, и вся лю́ди ве́рныя, е́же на па́жити благочести́вых недр, зла́чнаго твоего́ соблюде́ния, да пита́еми бу́дем всегда́, и светлостьми́ облиста́еми твоего́ заступле́ния, неврежде́ни пребу́дем, в тишине́ же и в любви́ и во смире́нии поживе́м че́стно, е́же и свято́е блаже́ньство твое́, при́сно велича́юще, ублажи́м же и просла́вим, си́це рцем: блажи́м тя Ми́ре, и́же Лики́йския страны́ гра́де, я́ко такова́ па́сты­ря и великому́дра учи́теля получи́л еси́, я́ко Христова́ непребори́ма во́ина, и́же ерети́ческия полки́ Бо́жиим сло́вом всеси́льным, я́ко копие́м острото́ю ра́зума пробода́я, и вся тех ле́стныя ко́зни низлага́я. Блажи́м блаже́ннаго, йи́же роди́вшаго тя, и воспита́вшаго, я́ко вели́к дар Бо́гови принесе́, вои́стину па́че вся́каго всепло́дия; не то́кмо же Лики́йстей стране́ похвала́ ты еси́, Нико́лае, но и всей вселе́нней преди́вное удобрение, вели́к бо еси́ в чудесе́х, е́же и святы́м свяще́ннейшее ра́дование. Тем и ны́не ве́рнии, соше́дшеся во святу́ю Це́рковь, мо́лим тя и вопие́м: О! о́тче святы́и Нико́лае, при́зри на́ люди ве́рныя, и напра́ви нас мольба́ми твои́ми, е́же изба́витися бесо́вскаго наве́та. И благоприя́тным Бо́гови бы́ти, Благода́тию Того́ и человеколю́бием, Иску́пльшаго нас честно́ю животворя́щею из ребр исте́кшею Кро́вию, Христа́ Бо́га на́шего, Ему́ же подоба́ет вся́ка сла́ва, честь и держа́ва и великоле́пие, со Отце́м и со Святы́м Ду́хом, ны́не и при́сно и во́ веки веко́м. Ами́нь (поклон земной).

Посем: Честне́йшую херуви́м. Слава, и ныне. Го́споди, поми́луй (дважды), Го́споди, благослови́ (с поклонами).

Отпу́ст: Го́споди, Ису́се Христе́, Сы́не Бо́жии, моли́тв ра́ди Пречи́стыя Ти Ма́тере, и и́же во святы́х отца́ на́шего Нико́лы, архиепи́скопа Мир Лики́йских чудотво́рца, и всех святы́х, поми́луй и спаси́ нас, я́ко Благ и Человеколю́бец. Ами́нь.

Го́споди поми́луй (трижды), и обычные исходные поклоны.