Богородичен, глас 1. Моли́твы Свои́х раб приими́ Богоро́дице, и изба́ви нас от вся́кия беды́, я́ко ро́ждьши Христа́ Спа́са, Изба́вителя душа́м на́шим.

Аще ли же среда и пяток, глаголется по гласу тро­паря крестобогородичен. И́же Твое́ заступле́ние стяжа́вше Пречи́стая, Твои́ми моли́твами от бед избавля́емся. И Кресто́м Сы́на Твоего́ всегда́ сохраня́еми, по́долгу Тя вси благоче́стно велича́ем.

Богородичен, глас 2. Ма́ти свята́я пречи́стаго Све́та, а́нгельскими пе́сньми чтуще Тя, пое́м и велича́ем. Крестобогородичен. Тебе́ велича́ем Богоро́дице, вопию́ще: ра́дуися же́зле, от него́ же без се́мене Бо́га прозябла́ еси́, разруши́вшаго дре́вом смерть.

Богородичен, глас 3. Ко́ждо иде́же спаса́ется, в пра́вду та́мо прибега́ет, и ко́е и́но таково́ прибе́жище, я́ко Твое́ Богоро́дице, покрыва́ющее душа́ на́ша. Крестобогородичен. Жезл си́лы стяжа́вше, Крест Сы́на Твоего́ Богоро́дице, тем низлага́ем вра́жия шата́ния, и́же любо́вию Тя непреста́нно велича́ющии.

Богородичен, глас 4. Стена́ непобеди́мая нам христия́ном еси́, Богоро́дице Де́во. К Тебе́ бо прибега́ющии, неврежде́ни пребыва́ем. И па́ки согреша́юще, и́мамы Тя Моли́твеницу. Тем благодаря́ще вопие́м Ти: ра́дуися Обра́дованная, Госпо́дь с Тобою́. Крестобого­родичен. Де́во всенепоро́чная, Ма́ти Христа́ Бо́га, ору́жие про́йде Твою́ пречи́стую ду́шу, егда́ распина́ема во́лею ви́де Сы́на и Бо́га Твоего́. Его́ же Преблагослове́нная моля́щи не преста́й, проще́ние согреше́нием на́шим дарова́ти.

Богородичен, глас 5. И́же от Де́вы восия́выи всему́ ми́ру, Христе́ Бо́же, и сы́ны све́та Тоя́ ра́ди показа́выи, поми́луй нас. Крестобогородичен. Кресто́м Сы́на Твоего́ Богора́дованная, и́дольская пре́лесть вся упраздни́ся, и бесо́вская кре́пость попра́ся. Сего́ ра́ди ве́рнии по́долгу Тя при́сно пое́м и благослови́м, и Богоро́дицу вои́стину испове́дающе, Тя велича́ем.

Богородичен, глас 6. По словеси́ Твоему́, Ма́ти и́с­тинная, се вси ро́ди блажа́ще, Тя пое́м и велича́ем. Крестобогородичен. Богоро́дице Де́во, моли Сы́на Своего́, во́лею пригвозди́вшагося на Кресте́, и ми́ра от льсти свобо́ждьшаго, Христа́ Бо́га на́шего, поми́ловати душа́ на́ша.

Богородичен, глас 7. А́ще и Ма́терь Тя тварь позна́, но Де́ву Тя Зижди́тель показа́. Роди́ бо пло́тию Христа́ Бо́га на́шего, спаса́ющаго душа́ на́ша. Крестобогородичен. Богоро́дице Чи́стая при́сно Де́вая, на Кресте́ зря́щи Своего́ Сы́на ви́сяща, я́ко Ма́ти пла́чущи, возвелича́ше стра́нное Его́ соше́ствие.

Богородичен, глас 8. Ра́дуися, я́же от А́нгела ми́ру ра́дость прие́мшая. Ра́дуися, ро́ждьшая Творца́ тва́ри. Ра́дуися, сподо́бльшаяся бы́ти Ма́ти Христа́ Бо́га. Крестобогородичен. А́гньца и Па́стыря и Спа́са ми́ру, на Кресте́ зря́щи рождьшая Тя, глаго́лаше слезя́щи: мир у́бо ра́дуется, прие́мля Тобою́ избавле́ние. Утро́ба же моя́ гори́т, зря́щи Твое́ распя́тие, е́же за всех терпи́ши, Сы́не и Бо́же мой.