Канон Благовещению

Канон, творение кир Феофана, глас 4

Песнь 1, ирмос:

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Сея зачатие.

Да поет Ти, Владычице, движа свирель духовную, Давыд праотец Твой: послушай Дщи радованна гласа от ангела, радость бо возвещает Ти неизглаголанную.

Вопию Ти, веселяся, приклони ухо Твое, и вонми ми, Божие поведающу без семене зачатие. обрете бо благодать пред Богом, еяже не обрете другая николиже, Пречистая.

Слава. Да разумею, ангеле, твоих словес силу, како будет, еже рече; глаголи явственно. Како зачну Девою сущи Отроковица; како же и Мати буду Зиждителю;

И ныне. Лестно мя вещати помышляеши, якоже прилучися, и радуюся, зря Твое утвержение. дерзай, Владычице, Богу бо хотящу, удобь скончаются преславная.

Песнь 3, ирмос:

Твоя певцы, Богородице, живыи нетления Источниче, лик себе совокупльши духовен утверди, и честным Ти зачатием, венцем славы сподоби.

Оскуде князь от Июды, время настало есть уже, в неже явится языков Надежда, Христос. ты же, како Сего рожду Девою сущи, скажи ми;

Ищеши от мене уведети Дево, образ зачатия Твоего, но той несказанен есть, Дух же Святыи зиждительною силою осенив Тя совершит.

Слава. Моя прабаба приемши волю змиину, пищи Божественныя изгнана бысть. темже и Аз боюся целования ти странна, стыдящися поползновения.

И ныне. Божии предстатель послан есмь, Божественныи совет поведати Ти. Что ся ми боиши, Пренепорочная, паче Тебе боящагося; что ми говееши, Владычице, говеющему ми Тебе честно;

Седален, глас 4.

Подобен: Удивися Иосиф:

Послан бысть Гавриил к Девей Марии, принося Ей неизглаголаную радость, яко зачнеши без семене, и родиши Сына Превечнаго Бога, и спасет люди от грех их. послушествует Пославый мя вопити Тебе радость, Благословенная, Девою родиши, и по Рожестве Девою паки пребудеши.

Слава, и ныне. Гавриил с Небесе, радуися зовет Чистей, яко зачнеши во чреве Превечнаго Бога, словом концы составльшаго. Она же к нему отвещаваше, мужа не знающи, како рожду Сына; и сказуя глаголаше Ангел Богородице Деве: Дух Святыи найдет на Тя, и сила Вышняго осенит Тя.

Песнь 4, ирмос:

Седяи во славе на престоле Божественне на облаце легце, прииде Исус Пребожественныи, от Пречистыя Девы, спасе же вопиющыя, слава, Христе, силе Твоей.

Святу некую Девицу раждающу, слышах пророка древле, Еммануила прорекша. хощу же разумети, како Божества размешение, естество человеческое претерпит;

Явила есть купина, неопальна пребывши, приемши пламень, Обрадованная Препетая, Твоего таинства преславное: по Рожестве бо пребудеши Чистая присно Дева.

Слава. Освещаемь сиянием Бога Вседержителя, истине Проповедниче, глаголи Гаврииле истину: како нетленне бывши чистоте Моей, Слова рожду с плотию Безплотнаго.

И ныне. Со страхом Ти, яко раб Госпоже предстою, с боязнию Дево, ныне смотрити стыжуся Тебе. Яко бо дождь на руно снидет на Тя слово Отчее, якоже изволи.

Песнь 5, ирмос:

Удивишася всяческая о Божественнем зачатии Твоем. Ты бо Неискусобрачная Дево, прият во утробе надо всеми Сущаго Бога, и родила еси Безлетнаго Сына, всем воспевающым Тя мир подавающаго.

Разумети не могу Твоих словес испытания. чудеса бо быша множицею, Божественною силою дивна бываемая, скрижали и законнии образы, родила девица без мужа николиже.

Дивит Пренепорочная, и странно бо чудо Твое, Едина бо Ты всех Царя приимши во утробе воплощаема. и Тя прообразуют пророческая речения, гадания и законнии образы.

Слава. Иже всем Невместимыи, и всем Невидимыи, како Сей может во чрево Девиче вселитися, еже Сам созда; како зачну Бога Слова, Собезначальна Отцу и Духови;

И ныне. К Твоему праотцу Давыду, обещася посадити от плода чрева, на престоле царства его. Ияковлю Тя Доброту, едину избра словесное селение.

Песнь 6, ирмос.

Возопил прообразуя погребение тридневное, пророк Иона в ките Богу моляся. из тли спаси мя, Исусе, Царю Сыи силам.

Глагол твоих, Гаврииле, глас радованен приемши, веселия Божественнаго исполнихся. радость бо возвещаеши неконечную.

Се Тебе дастся радость, Богомати Божия, и вся тварь вопиет Ти Богоневесто. Ты бо Едина Мати Божия, пронаречеся Чистая.

Слава. Еввы Мною ныне да упразднится осуждение, Мною долг древний, да воздан будет днесь, Мною радость древняя да дастся преисполнена.

И ныне. Обещася Бог Аврааму праотцу, благословити от семене его языки, Чистая, Тобою же прехождение обет приемлет днесь.

Кондак, глас 8.

Взбранной Воеводе победительная, яко избавльшеся от злых, благодарственная восписуем Ти раби Твои, Богородице: но яко имущи державу не победимую, от всяких нас бед свободи, да зовем Ти, радуйся, Невесто Неневестная.

Икос. Ангел предстатель с Небесе послан бысть рещи Богородице: радуися! и со безплотным гласом воплощаема Тя зря, Господи, ужасашеся и стояше, зовыи к Ней таковая: радуися, Еяже ради радость возсияет. радуися, Еяже ради клятва исчезнет. радуися, падшаго Адама возстание. радуися, слез Еввиных избавление. радуися, высото, неудобовосходимая человеческими помыслы. радуися, глубино, неудобь зримая и ангельскима очима. радуися, яко еси Царево Седалище. радуися, яко носиши Носящаго вся. радуися, Звездо, являющая Солнце. радуися, утробо Божественнаго воплощения. радуися, Еяже ради обновляется тварь. радуися, Еяже ради поклоняемся Творцу. радуися, Невеста Неневестная.

Песнь7, ирмос:

Не послужиша твари Богомудрии, паче Зиждителя. но огненное прещение мужески поправше, радовахуся поюще, препетыи иже отцем Господь и Бог благословен еси.

Свет невещественныи поведая, в вещественне телеси совокупляемь, за милосердие многое, светло Благовещение Божественнаго проповедания, ныне взываеши Ми, благословен, Пречистая, плод Твоего чрева.

Радуися, Владычице Дево, радуися Пречистая, радуися, Приятелище Божие, радуися свещниче света, Адамово воззвание, и Еввы избавление, горо святая, и преславное священие, и чертог безсмертия.

Слава. Душу очисти Ми, и тело освяти, Церковь сотвори вместну Богу. сень Богоукрашену, одушевлен храм наитием Пресвятаго Духа, и Жизни Чистую Матерь.

И ныне. Яко многосветлую свещу, и Богоделанен чертог, вижу Тя ныне яко злат ковчег. закону Подателя приими, Дево, благоизволившаго человеческое избавити Тобою тленное существо.

Песнь 8, ирмос:

Слыши Отроковице Дево Чистая, да речет убо Гавриил, совет Вышняго древле истинный. буди к приятию готова Богу, Тобою Невместимый с человеки поживет, тем и радуяся вопию, благословите вся дела Господня Господа, и превозносите Его во веки.

Ум всяк побеждается землен, отвеща Девица, ищущи, яже ми вещаеши, преславная слышах словеса Твоя, но боюся ужасающися, да не лестию мя яко Евву далече послеши от Бога, но обаче вопию, благословите вся дела Господня Господа, и превозносите Его во веки.

Се Тебе недоуменное разрешится. рече к сим Гавриил, добре бо рече вещь непостижна. словесем Твоих устен повинующися прочее, не сумнися яко льсти, якоже вещи веруй. аз бо радуяся вопию, благословите вся дела Господня Господа, и превозносите Его во веки.

Закон сей от Бога человеком есть, Непорочная абие рече, общия любве рожество происходит, не знаю ложа сверстника отнюд, како убо глаголеши, яко рожду; боюся, еда лесть глаголеши. но обаче вопию, благословите вся дела Господня Господа, и превозносите Его вовеки.

Слава. Глаголы, яже ми вещаеши, Чистая, ангел паки рече, обычай есть рожества человеком смертным. Сущаго же Ти Бога обещаваю, паче слова и смысла воплощаема, якоже весть из Тебе. темже и радуяся вопию: благословите вся дела Господня Господа, и превозносите Его во веки.

И ныне. Являешимися истине вещатель, рече Девая. радости бо общия пришел еси благовестник. дшу очистих с телом, и по глаголу твоему буди ми, да вселится Бог в мя, Емуже вопию с тобою, благословите вся дела Господня Господа, и превозностие Его во веки.

Песнь 9, ирмос.

Яко о душевнем Божии Киоте, не прикоснется никакоже рука не верных. уста же верных Богородице не молчно, глас Ангела да поют, радостию вопиюще, радуися Обрадованная, Господь с Тобою.

Паче смысла заченши Бога, естества обычая утаися, Отроковице, Ты бо в Рожестве матерьскаго избежа тленнаго естества. темже достойно слышиши, радуися Обрадованная Господь с Тобою.

Како точиши млеко, Дево Чистая; не может изрещи язык землен. странну бо естества показуеши вещь, законнаго рожества устав преходиши. темже достойно слышиши, радуися Обрадованная, Господь с Тобою.

Тайно во святых книгах речеся о Тебе, Мати Вышняо: лествицу бо древле Иаков Тя прообразующу видев, рече: степень Божия сия. Темже достойно слышиши, радуися Обрадованная, Господь с Тобою.

Слава. Чудно священноявленну Моисею, купина и огнь, показа чудо. иский же исход в прехождении времен, во Отроковице Чистей рече, зря. Ейже яко Богородице речется, радуися, обрадованная, Господь с Тобою.

И ныне. Даниил Тя нарече гору мысленную, Родительницу же Божию Исаия. видит же яко руно Гедеон. Давыд же священие глаголет, дверь же Тя ин. Гавриил же Ти вопиет: радуися, Обрадованная, Господь с Тобою.