Кано́н честно́му и животворя́щему кресту́

Кано́н честно́му и животворя́щему кресту́

Тропарь, глас 1-и.

Спаси́ Го́споди, лю́ди Своя́, и благослови́ достоя́ние Свое́, побе́ды держа́ве на́шей на сопроти́вныя да́руй, и Своя́ сохраня́я Кресто́м лю́ди (дважды). Слава, и ныне: той же.

Канон, глас 4-и. Песнь 1, ирмос.

Отве́рзу уста́ моя, и напо́лнятся ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся, Тоя́ чудеса́.

Запев: Сла́ва Го́споди, Кресту́ Твоему́ честно́му (поклон).

Кре́сте всеси́льне, апо́столом похва­ла́, преподо́бным утверже́ние, и ве́рным зна́мение, иера́рхом и му́чеником сла́ва, побе́да и утверже́ние всем хва́лящим Тя.

Запев. Кре́сте всечестны́и, четвероконе́чная си́ла, апо́столом благоле́пие, и му́чеником кре́пость, немощны́м здра́вие показа́ся, ме́ртвым воскресе́ние, па́дающим воздви́жение.

Слава. Кре́сте, ты ми си́ла бу́ди, кре́пость и держа́ва, изба́витель и предра́тник, на борю́щия мя, щит и храни́тель, побе́да и утверже́ние мое́, при́сно соблюда́ющи мя и покрыва́ющи.

И ныне, богородичен. На Кресте́ Всенепоро́чная, Своего́ Сы́на я́ко узре́, ору­́жие ско́рбное утро́бу Твою́ растерза́, и восклица́ла еси́, рыда́ющи в боле́зни, но а́бие просла́вила еси́ Креста́ си́лу.

Катавасия. Сохрани́ от бед рабы́ Своя́, си́лою честна́го Креста́ Твоего́, Ми́лостиве, я́ко усе́рдно к Тебе́ прибега́ем, к Ми́­лостивому Изба́вителю и всех Влады́це, Го́споду Ису́су (поклон).

Го́споди, поми́луй (трижды, с поклонами).

Песнь 3, ирмос.

Твоя́ певцы́ Богоро́дице, живы́и нетле́ния Исто́чниче, лик Себе́ совоку́плыпи, духо́вен утверди́, и в Боже́ственей Ти сла́ве, венце́м сла́вы сподо́би.

Запев. Кре́сте, преподо́бным ору́жие, обою́дный меч Христо́в, ве́рным удобре́ние, боля́щим исцеле́ние и заступле́ние, и воздви́жение уме́ршим, всече́стне.

Запев. Кре́сте, основа́ние благоче́стия, бесо́м показа́ся губи́тель, и це́рквам благоле́пие, нечести́вым поги́бель, враго́м посрамле́ние в день су́дныи.

Слава. Кресте живоно́сныи, ты ми бу́ди кре́пость, и побе́да и щит и стена́ нера́туема, бесо́м отгна́ние, и помысло́м погаше́ние, и ума́ моего́ сохране́ние.

И ныне, богородичен. Распя́тие поно­́сное, Де́во Влады́чице, Твой Сын претерпе́л есть, и смерть неподо́бную; но вознесе́ся, низве́рже проти́вныя вражия си́лы, я́ко Безсме́ртен. Катавасия.

Слава, и ныне. Седален, глас 8-и. Проначерта́ше та́йно дре́вле времене́м, Ису́с На́ввин креста́ о́браз, я́ко же ру́це простре́ крестообра́зно, Спа́се мой, и ста со́л­нечное тече́ние, до́ндеже враги́ погуби́, проти́вящияся Тебе́, Бо́гу; тем же за́йде, на Кресте́ Тя зря; и до́ле держа́ву сме́рти разори́в, и а́да связа́л есть.

Песнь 4, ирмос.

Седя́и во сла́ве на пре­сто́ле Боже́ствене, на о́блаце ле́гце, прии́де Ису́с Пребоже́ственыи, от Пречи́стыя Де́вы, и спасе́ вопию́щия: сла́ва Христе́, си́ле Твое́й.

Запев. Четвероконе́чныи сыи мир, и я́ко триобою́дныи меч, нача́ла тмы сече́ши. на́ми вообража́ем; Кре́сте, ору́жие вели­́кое Христо́во, и непобеди́мое победи́тельство всеси́льное.

Запев. Твоя́ высота́, живоно́сне Кре́сте, возду́шнаго кня́зя бие́т, и глубина́ всея́ бе́здны закала́ет змия, широту́ па́ки во­обража́ет, низлага́я мирска́го кня́зя, кре́ постию Твое́ю.

Слава. Вознесе́ся, сопривле́кл еси́ па́дшияся, воздви́гл еси́ естество́ земно́е престо́лу Бо́жию, спросла́вился еси́, Кре́сте, высота́ вели́кая, ми́рскии мо́сте, ду́шу мою́ от страсте́й глубины́ вознеси́ вско́ре.

И ныне, богородичен. Крестообра́зно, Пречи́стая Отрокови́це Богоро́дице, дла­́ни Свои́ распросте́рши, ко И́же на кре­сте́ воздви́женому, и моли́твы Де́во, ны́не принеси́, за всех ве́рно моля́щихся Тебе́. Катавасия.

Песнь 5, ирмос.

Удиви́шася вся́ческая о Боже́ственей сла́ве Твое́й, Ты бо браконеискуси́мая Деви́це, прия́т во утро́бе надо все́ми су́щаго Бо́га, и родила́ еси́ Безле́тнаго Сы́на, всем воспева́ющим Тя, мир подава́юща.

Запев. Кре́сте, небе́сная ле́ствице свя­ты́ни, степе́нем наста́вниче, Христо́ва вы­сота́ и сла́ва еси́. Бо́жии о́браз, назна́менателен ми́ру, неви́димому же и ви́димому единоче́стна.

Запев. Кре́сте, о́бразе неиспи́санныи си́­лою, освяще́ние вода́м, очище́ние возду́ху, освяще́ние и просвеще́ние вся́кому, му­́жеству зна́мение, и Христо́в ски́петро непрело́жный, проти́вныя в зе́млю попира́я.

Слава. Кре́сте всеси́льне, злочести́выя низложи́ враги́, ненави́дящия и ху́лящия Тя безу́мно, язы́ки попали́, и угаси́ шата­́ния их. О! Кре́сте всесвяты́и и христоно́сныи, сохрани́ нас державою Свое́ю.

И ныне, богородичен. Всех Цари́це Влады́чице, ски́петром рожества́ Твоего́ разруши́ Деви́це воста́ние, ху́лящим кре́стную си́лу. Даждь кре́пость и очи­ще́ние, побе́ду и по́мощь ве́рным лю́дем. Катавасия.

Песнь 6, ирмос.

Боже́ственое се и всечестно́е соверша́юще пра́зднество, богому́дрении Бо́жия Ма́тере. Прииди́те, ру­ка́ми воспле́щем, от Нея́ Ро́ждьшагося ве́рою сла́вяще.

Запев. Крест всем воскресе́ние, Крест па́дшим исправле́ние, страсте́м умерщв­ле́ние, пло́ти пригвожде́ние. Крест душа́м сла́ва, и свет ве́рным.

Запев. Крест враго́м губи́тель, Крест злочести́вым я́зва и плене́ние, и ве́рным держа́ва; благочести́вым храни́тель, и бесо́м отгони́тель.

Слава. Крест страсте́м па́губа, Крест помысло́м отгна́ние, Крест сокруше́ние язы́ческо искуси́тельно, и духово́м показа́ся лови́тельство.

И ныне, богородичен. Крест воздви́жется, и па́дают духо́в возду́шных чи́нове, Крест снизхо́дит, и нечести́вии вси ужаса́­ются, я́ко мо́лнию ви́дящи кре́стную си́лу. Катавасия.

Слава, и ныне. Кондак, глас 4-и. Вознесы́ися на́ Крест во́лею, тезоимени́тому ны́не жи́тельству Твоему́. Щедро́ты Твоя да́руй, Христе́ Бо́же. Возвесели́ си́лою Свое́ю держа́ву на́шу, побе́ды дая́ ей на сопоста́ты, посо́бие иму́щу Твое́ ору́жие, ми́ру непобеди́мую побе́ду.

Икос.

И́же до тре́тияго небесе́ восхище́н бысть в Рай, и глаго́лы услы́шав Боже́ственыя неизрече́нныя, и́хже не леть есть язы́ки челове́ческими глаго́лати. Что к гала́том пи́шет, я́ко рачи́телем Пи­са́нию, прочто́сте и разуме́сте; мне рече́, не бу́де хвали́тися, то́кмо о Кресте́ Го­спо́дни, на нем же страда́в, уби́ стра́сти. Того́ у́бо и мы известно держи́мся, Кре­ста́ Госпо́дня похвалы́ всех, есть бо нам спасе́ние сие́ дре́во, ору́жие ми́ру непобеди́мая побе́да.

Уставщик возглашает: Проки́мен, пса­ло́м Давы́дов (глас 4-и): Ви́деша вси кон­цы́ земли́, спасе́ние Бо́га на́шего.

Певцы поют прокимен весь.

Уставщик — стих: Воспо́йте Го́сподеви пе́снь но́ву, я́ко ди́вна сотвори́ Госпо́дь.

Певцы поют такожде весь прокимен.

Посем уставщик — прокимен до полу́, а певцы поют вторую половину прокимна.

Затем, Исусова молитва. Певцы: Ами́нь.

Уставщик: Вся́ко дыха́ние да хва́лит Го́спода.

Певцы это повторяют пением.

Стих: Хвали́те Бо́га во святы́х Его́, хвали́те Его́ во утверже́нии сил Его́.

Певцы: Всяко дыхание да хвалит Гос­пода (пением).

Уставщик еще: Вся́кое дыха́ние; певцы: да хва́лит Го́спода. Посем певцы возвышен­ным гласом: Го́споди поми́луй (трижды).

Уставщик: от Иоа́нна свята́го Ева́нге­лия чте́ние.

Певцы: Сла́ва Тебе́, Го́споди (поклон).

И, оградившись кре́стным зна́мением, слушаем со вниманием благове́стие.

Евангелие от Иоанна, зачало 42 (от полу́).

Рече́ Госпо́дь: Отче, просла́ви и́мя Твое́. Прии́де же глас с небесе́: и просла́вих, и па́ки просла́влю. Наро́д же стоя́и, слы́шав, глаго́лаху: гром бысть. Ини́и глаго́лаху: А́нгел глаго́ла Ему́. Отвеща́ Ису́с и рече́: не Мене́ ра́ди глас сей бысть, но наро́да ра́ди. Ны́не суд есть ми́ру сему́, ны́не князь ми́ра сего́ изгна́н бу́дет вон. И а́ще Аз вознесt́н бу́ду от земли́, вся привлеку́ к Себе́. Се же глаго́лаше, назна́менуя, ко́ею сме́ртию хотя́ше у́мрети. Отвеща́ ему́ наро́д: мы слы́шахом от зако́на, я́ко Христо́с пребыва́ет во́ веки. Ка́ко Ты глаго́леши: вознести́ся подоба́ет Сы́ну Челове́ческому. Кто есть сей Сын Челове́ческии? Рече́ же им Ису́с: еще́ ма́ло вре́мя Свет в вас есть; ходи́те, до́ндеже Свет и́мате, да тьма вас не и́мет. И ходя́ и во тьме, не весть, ка́мо и́дет. До́ндеже Свет и́мате, ве́руйте во свет, да сы́нове Све́та бу́дете.

Певцы: Сла́ва Тебе́, Го́споди (поклон).

И далее, пением: Сла́ва Отцу́ и Сы́ну и Свято́му Ду́ху: О́тче, Сло́ве и Ду́ше, Тро́ице Свята́я, очи́сти мно́жество согреше́нии на́ших.

И ны́не и при́сно и во́ веки веко́м, ами́нь: моли́тв ра́ди Богоро́дицы, Ми́лостиве очи́сти мно́жество согреше́нии на́ших.

Поми́луй мя Бо́же, по вели́цей ми́лости Твое́й, по мно́гим щедро́там Твои́м, очи́сти беззако́ния моя́, Бо́же Спа́се мой.

И стихера (по 50-м псалме), глас 6-и. Кре́сте Христо́в, христия́ном упова́ние, заблу́ждыпим наста́вниче, тружа́ющимся тишина́, во бране́х побе́да, вселе́нней утверже́ние, неду́жным врачу́, ме́ртвым воскресе́ние, поми́луй нас.

Песнь 7, ирмос.

Непослужи́ша тва́ри богому́дрении, па́че Зижди́теля, но о́гненое преще́ние му́жески попра́вше, ра́довахуся пою́ще: препе́тыи, И́же отце́м, Госпо́дь и Бог, благослове́н еси́.

Запев: Пресвята́я Тро́ице, Бо́же наш, услы́ши моли́тву раб Свои́х, моля́щихся Тебе́.

Неразде́льную Тро́ицу и неслия́нну, естество́ еди́нством богосло́вим. Отца́ нерожде́на, и рожде́на Сы́на, и Свята́го исходи́тельнаго Боже́ственаго Ду́ха пе́сньми пою́ще: благослове́н Бог оте́ц на́ших.

Запев. Незаходи́тельными мо́лниями Твои́ми трисоста́вне, на́ша озари́ у́мныя о́чи, добро́ту Твою́ трисве́тне, пресущественую зре́ти, я́же челове́ком неве́домая, и непристу́пная а́нгелом.

Слава. Луча́ми све́та Твоего́, па́дшую ми ду́шу возведи́ от глубины́, Благи́и Бо́же, препе́тыи и всеси́льныи, попо́лзшуюся о́т Света благода́тнаго, и во тьму́ воглу́бльшуюся.

И ныне, богородичен. Крестообра́зно просте́рши ру́це Чи́стая, к распросте́р­шему Свои́ ру́це на́ древе кре́стнем, и возне́сшу естество́ на́ше, и умертви́вше­му враже́бныя полки́, моля́щи непреста́й. Катавасия.

Песнь 8, ирмос.

О́троки благочести́выя в пещи́, рожество́ Богоро́дичо спасло́ есть. Тогда́ у́бо образу́емо, ны́не же де́йствуемо, вселе́нную всю воздви́же пе́ти: Го́спо­да воспева́йте де́ла, и превозноси́те Его́ во́ веки.

Запев. Высота́ Христо́вых страсте́й, и лук и ору́жие и меч, ору́жие непосты́дное, и си́ла непобеди́мая, Христо́во подно́жие, и победи́тельство на враги́, зна́мение ца́рьствия, ски́петре ве́рных показа́ся, Кре́сте победоно́сне.

Запев. Воздви́гл еси́ на́ше па́дшее есте­ство, Христо́м распе́ншимся, и совоста́вив. Высота́ боже́ственая, глубина́ неизглаго́ланная, Христо́во ты еси́ зна́мение, Кре́сте пребога́те, и широта́ безме́рная, и зна́мение непости́жимыя Тро́ицы, Жизноно́сче.

Слава. Уста́ми, душе́ю же и се́рдцем Крест Госпо́день лебыза́юще, прииди́те ны́не вознесе́м вен и возвели́чим, поклоня́ющеся (поклон), рцем вку́пе песнь пре­чи́стую вопию́ще: ра́дуйся вели́кое бога́тьство Кре́сте, церко́вное украше́ние.

И ныне, богородичен. Дре́во жи́зни и спасе́ния, дре́во беземе́ртия, дре́во ра́зу­ма, дре́во трилюбе́зно, нетле́нно и не из­нуря́емо, Крест трисоста́вныи, честно́е дре́во, Тро́ицы бо но́сит трисоста́вныя о́браз. Катавасия.

Песнь 9, ирмос.

Всяк зе́мен да взыгра­́ется, ду́хом просвеща́ем, да ликовству́ет же безпло́тных умо́в естество́, почитая святое торжество Бо́жия Ма́тере, и да по­е́т: ра́дуйся Преблаже́нная, Богоро́дице Чи́стая, при́сно Де́во.

Запев (поклон). Кто слы́шана сотво­ри́т, я́ко же пи́шет, де́йствия твоя́, миролюбе́зныи Кре́сте, си́лы и чудеса́, и уме́р­шим воста́ние, и мир весь совозне́сл еси́, вознесы́ися к Бо́гу, многожела́емыи.

Запев. Утверже́ние ве́рным, Крест треблаже́нныи, зна́мение и похвала́, дре́во всеси́льное, Крест Христо́в вели́кии и соверше́ныи. Апо́столом похвала́, преподо́бным утверже́ние, и му́чеником кре́пость и держа́ва, царе́м побе́да и похвала́.

Слава. Ра́дуйся Кре́сте, о́бразе неопи́санныи и многоимени́тыи, дре́во требога́тное, стра́шно же и всеблаже́нно. Ра­́дуйся Кре́сте всесвяты́и и всеси́льным, ра́дуйся храни́телю жи́зни на́шей, Гос­по́день Кре́сте многопе́тыи.

И ныне. Кре́сте честны́й, храни́тель души́ и те́лу бу́ди ми, о́бразом свои́м бе́сы низлага́я, враги́ отгоня́я, стра́сти упраж­ня́я, и благослове́ние да́руя ми, и жизнь и си́лу, соде́йствием Свята́го Ду́ха, и чест­ны́ми Пречи́стыя мольба́ми. Катавасия.

Задостойник: Влады́чице, приими́ моли́тву раб Свои́х (стр. 92, поклон земной).

Трисвято́е, и по Отче наш. Молитва Исусова. Тропарь: Спаси́ Го́споди, лю́ди Своя́. Слава, и ныне, кондак: Вознесы́ися на́ Крест во́лею. Го́споди поми́луй (40, с поклонами). Слава, и ныне. Честне́йшую херуви́м. Слава, и ныне. Господи поми́луй (дважды) Го́споди благослови́ (с поклона­ми).

Отпу́ст. Го́споди, Ису́се Христе́, Сы́не Бо́жии, моли́тв ра́ди Пречи́стыя Ти Ма́тере, си́лою честна́го и животворя́щего Креста́, и всех святы́х, поми́луй и спаси́ нас, я́ко Благ и Человеколю́бец. Ами́нь.

Го́споди, поми́луй (трижды), и обычные исходные поклоны.